Syair Bujang Begal

SYAIR BUJANG BEGAL
oleh yadhi rusmiadi jashar

Ini cerite ndai dusun tinggal
Jeme ke ume pegi nugal
Di huma ade bujang begal
Mehanjak tue lakunye bengal

Laku Bujang luar biase
Bapang Endung dianggap kance
Kelepeh Bapang diambek isinye
Serane endung enjok ke rande

Dek tau Bapang nak rugat agi
Ditawekan bujang nunjokkan gigi
Endung rungsing sejadi-jadi
Bujang pusing lahi ke buri

Bujang runtik anak Wak Riye
Gawinye ngatik nak husek saje
Gadis cinde nak dilinjanginye
Tapi dek ade ngesir ngan die

Malam minggu lok biasenye
Bujang mengar bedandan gile
Gumbak disunggar mengkilap raye
Minyak sayur digelusohkannye

Dek pule lupe hum-human
disemprotnye kiri nggok kanan
Bangat embaunye keliwatan
Sedusun raye ke-embau-an

Bujang begal la siap luncur
Begancang njagal ke dusun pancur
Bejalan keting keletar keletur
Jeme pening mukenye ancur

Bujang Wak Riye mandak ngejut
Nginak bidare kening mencucut
Ati betanye bulu alis betaut
Sape name si gadis lembut

Ui endung, alangke semampai gadis itu
Dudok nyeradai di tundan pintu
Gumbak melambai matenye sayu
Muke aduhai asli melayu

Ngihim senyuman adui manisnye
Bujang kelinjangan bebunge bunge
Siti Kelembungan name lengkapnye
Anak Bik Saman die rupenye

Gadis di tundan ngumong dialun
Suarenye ngedan mengayun ayun
Bujang kelinjangan mangap tetegun
Siti Kelembungan mantap bepantun

"Kedalak oi kedali dali
Anak tiung belage tige
Amun galak kebile agi
Nunggu setaun lame ige"

"Batang pedare dahan kayu
Batang embacang jeme seberang
Kakang bekate ngan umakku
datang gancang kite betunang"

Oi bapang tulungla aku
Siti Kelembungan jadikan mantu
Budi pekertinye alap bemutu
Ilok parasnye dek mbuat malu

Bujang sanggup berikrar janji
Ngubah laku amun la jadi
Bebenah idup meniti ahi
Asal bepadu tambatan hati.

~~Griya Sriwijaya, Nopember 2010~~